He hui angitū hei kōkiri i ngā tika tangata a Ngāi Māori

He hui angitū hei kōkiri i ngā tika tangata a Ngāi Māori

December 12, 2016

I ngā marama o nā tata nei, ka whakatūria e te Kōmihana ngā hui e rua e pā ana ki te Whakapuakitanga a te Kotahitanga o te Ao mō ngā Tika Iwi Taketake, arā hei whakapiki i te mōhiotanga o ngā tāngata o Aotearoa ki te Whakapuakitanga, hei whakapiki hoki i te mārama ki tāna whai pānga ki a rātau. 

I whakatūria te hui tuatahi i te Hepetema, ka aro nei tōna aro ki te whakapapa o te Whakapuakitanga ki roto o Aotearoa, ki tōna whai pānga mai ki Aotearoa ināianei, hei ānamata hoki. Ka tū te hui nei ki te Tari a te Kōmihana Tika Tangata ki Tāmaki Makaurau, ko ngā kaikōrero matua: ko Tākuta Pita Sharples, Minita Māori o mua; ko Prue Kapua, Perehitene o te Rōpū Wāhine Māori Toko i te Ora; ko Valmaine Toki, he mema nō te Kāhui Iwi Taketake o te Kotahitanga o te Ao. 

Ko te aronga o te hui tuarua, he mea whakahaere ngātahi e Awa me te Kōmihana, ko te wāhi ki ngā tikanga tuku ripoata a te Kotahitanga o te Ao hei huarahi kōkiri i ngā take tika tangata e pā ana ki a Ngāi Māori. Ka tirohia ngā ripoata e haere mai ana, ka kōrerotia hoki ngā huarahi tuku tāpaetanga mō ngā ripoata nei. 

Ko Karen Johansen te Kaikōmihana Tika Iwi Taketake. Hei tāna, he huarahi ēnei hui e whakapiki ai te Kōhimana i te mōhiotanga o te iwi whānui ki te Whakapuakitanga me te mārama hoki me pēhea te whakamahi i te Whakapuakitanga hei whakapiki i ngā āhuatanga o te noho a Ngāi Māori ki roto o Aotearoa. 

“Kei raro tonu a Ngāi Māori e haere ana, arā ki roto i ngā tatauranga mātauranga, hauora, whai mahi me te rāngai ture hoki, arā he tokomaha tonu a Ngāi Māori ki roto i ngā mahi a ngā kooti. 

“E aro ana te Whakapuakitanga ki te whai wāhitanga, ki te kore toihara, ki te tino rangatiratanga hoki. Ka noho ia he tino taputapu hei whakatinana i te Tiriti o Waitangi, he tino tautoko hoki mō ngā mahi ki roto i ngā hapori maha, ki roto i ngā tari me ngā whakahaere pāpori hoki ki te whakapiki i te āhua o te noho o Ngāi Māori me te whai painga a Ngāi Māori i ā rātau tika tangata”.  

Ko ngā hui e rua nei hei tīmatanga mō ngā hui a te Kōmihana Tika Tangata hei whakatairanga i te Whakapuakitanga a te Kotahitanga o te Ao mō ngā Tika Iwi Taketake. 

“Kei te pīrangi mātau ki te akiaki i te iwi whānui ki te whai kōrerorero mō ngā tika iwi taketake me ngā mahi hei whakatinana i ēnei tika. Kei te pīrangi hoki mātau ki te tautoko i a Ngāi Māori ki te whakamahi i te Whakapuakitanga” hei tā Ms Johansen. 

You can read the English translation here

Tūrangawaewae

Tūrangawaewae is the Human Rights Commission's newsletter. You can read our latest newsletter here.