He mahi anō me mahi e whakatinanatia ai te UNDRIP

He mahi anō me mahi e whakatinanatia ai te UNDRIP

June 1, 2017

Kua tata huri tōna tekau tau i te whakaūnga o te Whakapuakitanga o Ngā Tika Iwi Taketake e te Kotahitanga o Ngā Iwi o te Ao, engari ka nui te ango i ngā tika e tohua ana i te Whakapuakitanga me tōna whakatinanatanga.

I rite tonu te puta o tēnei kōrero i te hui ā-tau a te Wānanga Pūmau mō ngā Take Iwi Taketake o te Kotahitanga o Ngā Iwi o te Ao, i tū nei mō te rua wiki i te Paengawhāwhā me te Haratua ki te

Pūtahitanga o te Kotahitanga i te Āporo Nui. I tae atu tōna 1,000 māngai nō ngā iwi taketake o te ao, me ngā tari o te Kotahitanga me ngā tira kāwanatanga hoki.

Ko te aronga nui o te hui i tēnei tau, ko te huritau tekau o te Whakapuakitanga, ā, i tirohia hoki ētahi take e pā ana ki ngā tika o ngā taiohi iwi taketake, o ngā wāhine iwi taketake me ngā kaiwhakangungu tika iwi taketake – he tokomaha tonu rātau, huri noa i te ao, ka noho whakamōrearea kei whiua, kei mauheretia, kei whakamatea rānei mō te whawhai kia mau ō rātau tika tangata.

Ko te tiaki i te whenua, i te wai me ngā rawa o te taiao tētahi anō take nui ki te hui.

I tae atu te Kaitakawaenga o Te Kōmihana Tika Tangata, ko Jessica Ngātai, ki te Wānanga Pūmau nei hei mema nō te tira o ngā whakahaere tika tangata o Āhia-Te Moana-nui-a-Kiwa.

“Ko te Whakapuakitanga nei te hua o te whawhai roa a ngā kaihāpai iwi taketake o te ao, tae mai ki Aotearoa nei. He tino ekenga taumata tōna whakaūnga i te tekau tau ki muri mō ngā tika iwi taketake, ā, he nui tonu tōna pitomata.

“ko te tino kōrero i te Wānanga Pūmau – nā ngā iwi taketake, nā ngā mātanga me ngā tari a te Kotahitanga, nā ngā kāwanatanga hoki – kāore i te rawaka ngā mahi hei whakatinana i te Whakapuakitanga.”

Ko ētahi o ngā taiapa i kitea i te Wānanga, koia: ko te aro kore o ngā kaitōrangapū; ko te iti o te pūtea tautoko; ko te tikanga kia whakatakotoria he takohanga mārō me te arotake i ēnei.

Kua aro te Kōmihana ki ēnei take i tāna Raupapa Mōhiohio Tika Iwi Taketake.

Kua whakaritea e Te Kōmihana Tika Tangata ētahi hui ki te whakatairanga i te mōhiotanga me te matapaki mō te Whakapuakitanga, i te tata haere mai o tōna huritau tekau hei te 13 o Mahuru i tēnei tau.

He tokomaha tonu kua tae mai ki ēnei hui, ā, kua tupu te hiahia whai-tikanga ki te Whakapuakitanga - arā he aha nei ai, he aha āna tikanga, ā, me pēhea te whakamahi hei whakapiki i ngā hua e hua ana ki te iwi Māori.

Ko te hui e whai mai nei i te Raupapa Mōhiohio Tika Iwi Taketake ka tū ki te Whare Takiura o Manukau hei te 14 o Pipiri, ka aro ki te kaupapa o te Noho Ōritenga me te Kore Toihara. Pāwhiri ki konei hoki atu.

Mō ētahi atu kōrero mō te Wānanga Pūmau mō Ngā Take Iwi Taketake.

Te Pūrongo Tāmua o te Hui Tekau mā Ono a te UNPFII.

Tūrangawaewae

Tūrangawaewae is the Human Rights Commission's newsletter. You can read our latest newsletter here.