Ka eke panuku te hui UNDRIP a te Kōmihana

Ka eke panuku te hui UNDRIP a te Kōmihana

September 26, 2017

Nō nā tata nei i tū ai te hui a te Kōmihana, me te Pokapū ā-Ao mō te Ārahi Iwi Taketake kei Te Kunenga ki Pūrehuroa, hei whakanui i te 10 tau o Te Whakapuakitanga o ngā Tika Iwi Taketake a Te Kotahitanga o ngā Iwi o te Ao, hei kōrero hoki i te huarahi whakamua mō nga tika iwi taketake ki Aotearoa nei.

I tū te hui mō Te Whakapuakitanga o ngā Tika Iwi Taketake ki Te Papa i te 5-6 o Mahuru, nōna ka whakawhāiti mai ko ngā tino mātanga o Aotearoa mō te Whakapuakitanga me ngā tika iwi taketake ki te wānanga i tāna whai pānga mai.

Hei tā te Kaikōmihana Matua mō ngā Tika Tangata, hei tā David Rutherford, i korero nei ia i te tīmatanga o te hui, ko te tae ki te tekau tau he tino ekenga taumata, he wā hoki e taea ai te wānanga me te kōrero mō Te Whakapuakitanga.

“Tērā tonu ngā āputa nui i Aotearoa nei, arā mō te whakatinana i te Whakapuakitanga. I whai wā te hui ki te arotake i ngā mahi kua oti i te tekau tau nei, ki te whakatakoto hoki he anga tūkaha e whakatinanatia ai ngā tika iwi taketake ki tēnei whenua.

“Hei painga mō ngā whakatipuranga e heke mai nei, kei te ū mātau tērā me kōkiri ngā mahi e tutuki ai ngā whāinga o Te Whakapuakitanga. Ka whakamahi te Kōmihana i ngā hua o te hui, arā ko tā mātau i ako ai, i kōrero ai, ki te ārahi i ā mātau mahi e pā ana ki ngā tika iwi taketake, ā, haere ake nei” e ai ki a David Rutherford.

Ko Pereri Hathaway te Kaiwhakarite a te Kōmihana, hei tāna, ko te hui he wā hei whakanui i Te Whakapuakitanga, erangi ko te mea nui, hei kōrero hoki mō ngā tika iwi taketake o te Māori.

“He rawe te whakarongo ki ngā kaikōrero tino whakaiihiihi, pēnei i a Tā Pita Sharples, i a Naida Glavish, i a Moana Jackson, me te kaikōrero rangatahi, ko Pania Newtown. Katoa ngā kaikōrero ka whakatakoto he tirohanga motuhake ki Te Whakapuakitanga me ngā tika iwi taketake a te Māori.

“Kua rite tonu te kōrerotia o Aotearoa hei tino tauira mō ngā take iwi taketake ki Te Kotahitanga, engari he nui tonu ngā mahi kei mua i a tātau e mana ai ngā tika a te Māori hei tangata whenua, hei hoa Tiriti hoki”, hei tā Pereri Hathaway.

I whakatū awheawhe ngā kaimahi a te Kōmihana i te rā tuarua o te hui, ki te kōrero mō te wāhi ki a ia i te hātepe tuku pūrongo ki ngā whakahaere a Te Kotahitanga mō ngā tika tangata me ngā huarahi hei whakakaha i te whai wāhi mai o te iwi whānui.

He mātanga tika tangata a Jess Ngātai ki te Kōmihana i noho ki te rōpū whakatakoto kōrero, hei tāna he tino huarahi pai te awheawhe ki te whakamōhio haere i te iwi ki ngā mahi a te Kōmihana me te wāhi ki a ia hei whakatutuki i ngā whāinga o Te Whakapuakitanga.

“He tino huarahi pai te tū me te kōrero ki mua i te tāngata e taea ai e mātau te whakaako me te whakamōhio i a rātau ki ngā mahi a te Kōmihana me te wāhi ki a mātau e whakapikitia ai ngā huanga ki ō tātau hapori iwi taketake.

“He mea whakahīkaka te whakarongo ki ngā kōrero a te hunga i tae atu ki te hui me te nui o te hiahia mai o te hunga i iti nei te mōhio ki ngā mahi a te Kōmihana i mua, engari kua hiahia ki te whai wāhi mai ki ā mātau ratonga me ā mātau hōtaka.”

Kei te kohikohi haere te Kōmihana i ngā whakaaturanga me ngā ataata o ngā kōrero i te hui hei mātakitaki mō te hunga e pīrangi mai ana. Ka wātea ēnei ki www.hrc.co.nz hei ngā wiki tata nei.

Tūrangawaewae

Tūrangawaewae is the Human Rights Commission's newsletter. You can read our latest newsletter here.