Ka whakanuia te whakawhanaungatanga-ā-iwi puta noa i Aotearoa

Ka whakanuia te whakawhanaungatanga-ā-iwi puta noa i Aotearoa

April 16, 2018

Ko te Rā Whakawhanaungatanga-ā-iwi tērā ka titia ki te mahara i te mahi a ngā tini hapori o Aotearoa i tēnei tau, arā, i ngā kaupapa e 35, nuku atu, mai i Muriwhenua tae atu ki Murihiku. Nā, ahakoa te kupu ‘rā’ nei, ka haere ngā mahi whakanui i tō tātau kanorautanga i te Huitanguru ki te Haratua.

I tae atu a Kahurangi Susan Devoy ki te maha o ēnei kaupapa, pēnei i te hui nui i tū ki te Whare o te Kāwanatanga ki Tāmaki Makaurau me te hīkoi mō te marie ki Te Whanga-nui-a-Tara. Ka mutu āna haerenga ki te whakataetae mō ngā Whaikōrero Whakawhanaunga-ā-iwi hei te Haratua nei.

I āna kōrero i ngā takunetanga ki Tāmaki Makaurau me Te Whanga-nui-a-Tara, ka hoki a Kahurangi Susan ki te pūtaketanga mai o te rā me te mahara ki ngā tamariki o Soweto me Sharpeville i whakamatea i a rātau e mautohe mārie ana i ngā mahi whakatāuke tangata. Ko Anne Frank anō tētahi kua rangona āna kōrero e ngā whakatipuranga.   

Ko te mana o te kōrero te tino pūtake o ngā hōtaka aukati whakatoihara a te Komihana.

“I te wā i tīmata ai ngā mahi nei, mōhio tonu mātau he tokomaha a Ngāti Kiwi e mahara ana kāore ā tātau raruraru whakatoihara, whakahāwea rānei ki Aotearoa. Heoi, ka tīmata ā mātau kōrero ki a Ngāi Māori, ki ngā Kiwi Āhia, ki ngā Kiwi Moana-nui-a-Kiwa, ki ngā Kiwi Ihirama hoki – he kōrero tā te katoa mo ēnei āhuatanga. He kōrero mō te whakahāwea, he maharatanga mō te whakamā, he wā ka rangona te whakaiti,” hei tāna.

I ia tau, e āhua 400 ngā tāngata ka tuku mai i te amuamu ōkawa mō te whakatoihara. Engari, ko te tino tokomaha kāore e amuamu, kāore e tuku kōrero whānui ina ka ūmeretia ki te kanga whakatoihara e ngā tangata o te motokā e hipa ana, ina ka mememene te wahine rēhita o te whare wānanga ki ngā tauira katoa hāunga ngā tāngata paraone, ina ka karangatia ā rātau tama ki te ingoa whakatoihara i te papa whutupōro. 

He kaupapa a Ko tātau tēnei mō te tuku i ngā momo kōrero nei, nāna i tahuri mai te aro o te tangata, arā ka whakarongo, ka ako hoki a Ngāti Kiwi ki ngā āhuatanga o te whakahāwea ina ka pā mai ki a koe. Ko te mahi o muri mai, he whakaingoa atu i ngā whanonga whakatoihara, whakahāwea hoki, he wero atu, ā, ko te tumanako, he whakarerekē atu. 

Ko Taika Waititi te kanohi o ngā mahi nei, ka tautokona mai e te whānuitanga o te tangata i te kaupapa o Tukua te Kore ki te Whakatoihara. Koinei ngā tino tāngata o Aotearoa, ā, e kite nei tātau he tino māia rātau, hei tā Kahurangi Susan. 

Ko tā rātau kupu – ka pēhea ina ka tukua te kore noa iho nei ki te whakatoihara? Kāore he whakamiha? Kāore he wāhi? Kāore he mana. Ka pēhea ina ka tae atu a Tukua te Kore ki te Whakatoihara ki ngā tāngata o te ao, ā, ki konei ki ā tātau tamariki tonu o Aotearoa nei.

Nō muri mai i te whakarewanga o te kaupapa nei, ka hāpai ngā tamariki o te Kura o Te Whānau Tapu ki Porirua i ngā kōrero nei, ka waihanga he kiritata poto  e tono ana i te hinatore iti. Ko tō rātau hiahia, kia whakahuatia tika ō rātau ingoa e ō rātau kaiako, me ētahi atu. 

Tīmata ana te whakatoihara i te iti, ka pēnā hoki te tīmata o te tuku kore. 

Kei te titiro whakamua a Kahurangi Susan ki ngā mahi nui a ngā rangatahi o Aotearoa ka kitea mai i te whakataetae mō ngā Whaikōrero Whakawhanaunga-ā-iwi a te iwi Bahai ka tū hei te Haratua.  

Kua huri te ao, nā ngā kōrero a ngā tamariki i māia ki te tū rangatira mō ō rātau tika, hei tāna.